2016-cı ildə ilk dəfə Bakının Nərimanov rayonunda yerləşən “Gənclik Mall” ticarət mərkəzində fəaliyyətə başladı. Adı “Bravo” idi…


Bizimesr.az bildirir ki, ilk öncə bunu öyrənək – “Bravo” nə deməkdir?


Bravo sözü əsasən tərif, heyranlıq və ya alqış mənasında işlənən, italyan mənşəli bir ifadədir. Azərbaycanda “afərin”, “əla” kimi tərcümə olunur. Eyni zamanda, tarixi kontekstdə “bravi” (təkdə: bravo) İtaliyada muzdlu qatillər və ya zorakı əsgərlər mənasına gəlir. Bu məna Alessandro Manzoninin “Nişanlılar” (“I Promessi Sposi”) romanı ilə bağlıdır. Manzoni bu əsərində “I Bravi” adlanan silahlı dəstələri təsvir edirdi. Onlar Lombardiyada zadəganların xidmətində duran, insanları qorxudan, zorakılıqla məşğul olan quldur dəstələri idi.


Amma söz zaman keçdikcə “qorxuducu adam”, “quldur” mənasında işlənməyə başlasa da, müasir dünyada “əla!”, “afərin!”, “çox yaxşı!” kimi istifadə olunmağa başladı.


Beləliklə, 2016-cı ildə Azərbaycanda 1 mağaza ilə fəaliyyətə başlayan “Bravo” sürətlə marketlər şəbəkəsinə çevrildi. Əslində, ona qədər ölkəmizdə, əsasən paytaxtda böyük supermarketlər var idi. Amma “Bravo” sürətlə onları arxada qoyaraq brendləşdi və bu günümüzə qədər gəlib çatdı. Onun necə rəqabət apararaq bu mərhələyə gəldiyi bəllidir. Məsələn, hansısa bir marketin yanında “Bravo” açılır və həmin market qısa zamanda bağlanırdı. Böyük rəqabətə davam gətirmək təbii ki, mümkün deyil.


Amma bir məqam bu gün daha çox diqqət çəkir. “Bravo” marketlərində qiymətlər digərlərinə nisbətən çox bahadır və bu, ölkənin bütün alıcıları üçün əlçatan deyil. Böyük bir komanda ilə fəaliyyət göstərən “Bravo” marketlərinə isə 2023-cü ildən Baş İcraçı Direktor vəzifəsi Jaime Teixeiraya həvalə olunub.


Kimdir Jaime Teixeira?


Rəsmi mənbələrdə Jaime Teixeira barədə o qədər də dəqiq məlumat yoxdur. Sadəcə onun “LinkedIn” hesabında qeyd olunur ki, o, 1999–2000-ci illərdə IAE Paris – Sorbonne Biznes Məktəbində oxuyub. Jaime Teixeira La Plaza de Dia, DIA İspaniya, LIDL Belgium və Lüksemburq və LIDL France kimi böyük şəbəkələrdən öyrənib. Onun kariyerası demək olar ki, Avropanın ən böyük marketlər şəbəkəsi sayılan, 12.700-dən çox mağaza ilə fəaliyyət göstərən iki Alman beynəlxalq endirimli supermarketlər şəbəkəsi tərəfindən istifadə edilən ticarət nişanı “Lidl” marketlər şəbəkəsi ilə bağlıdır. Jaime Teixeira “Lidl” şəbəkəsində əsasən Fransada müxtəlif vəzifələrdə çalışıb və böyük kariyera imkanları qazanıb. “Lidl” isə dünyanın endirimli qiymətləri ilə satış edən şəbəkəsi kimi tanınır.


2023-cü ildən isə “Bravo” Marketlər Şəbəkəsinə yəqin ki, böyük töhfələr vermək üçün gətirilib və təbii ki, yüksək əmək haqqı da alır. Amma nə sirrdirsə, “Bravo” marketlərində qiymətləri ucuzlaşdıra bilmir və endirimli qiymətlərdən insanlar yararlanmır. Bu gün “Bravo” ölkənin ən bahalı satış edən marketlərindən biri olaraq qalmaqdadır. Maraqlıdır, o yekəlikdə “Lidl” kimi böyük şəbəkədə öyrəndiklərini Jaime Teixeira niyə Azərbaycanda tətbiq edə bilmir?


Daha bir maraqlı nüans da diqqətdən qaçmır. “Bravo” Supermarketlər Şəbəkəsinin əsas idarəedici şəxsləri xaricilərdir-


Wojciech Benn, Baş Əmlak Məmuru;
Ewan McMahon, Əməliyyat direktoru;
Lucian Spataru, Əməliyyat direktoru.


Qarşı tərəfindən fikirlərini dərc etməyə hazırıq